The Classic Horror Show Ch3

 

Photo: www.scaryforkids.com

CHAPTER III     One

Walang schedule na klase sa Computer Laboratory 1 kapag Friday ng alas-4 hanggang gabi kaya eto ang chance ni One para makapaglinis at macheck kung anong problema ng mga unit.

Alam niyang may tatlong units ng computer ang kailangan niyang tingnan base na rin sa request ng computer instructors. 

Working student si One, at ang Lab 1 ang kanyang assignment. Galing siya sa mahirap lang na pamilya, magsasaka ang ikinabubuhay. Dahil sa kagustuhang makapag college, swerteng natanggap bilang computer assistant ng paaralan. Libre tuition fees at miscellaneous fees, may konting babayarin na lang at allowance ang kanyang iisipin. Kaya na itong suportahan ng kanyang ate na nasa abroad bilang domestic helper.

Juan talaga ang pangalan niya. Pero ayon sa kanya, nasa syudad na siya kaya dapat modern na rin ang tawag sa kanya.

Isang ilaw lang ang binuksan ni One, pagtitipid na rin at saka para di siya makita ng ibang estudyante. Minsan kasi, may mga estudyanteng nagpupumilit pumasok at makigamit ng computers. Mahirap tumanggi lalo na kapag ka-tropa. May policy na walang estudyanteng pwedeng gumamit ng laboratory kapag hindi schedule ng klase.

Napatingin si One sa orasan, malapit nang mag alasais. Okay lang, isang unit na lang ang kanyang aayusin. Nakikinig siya ng music mula sa Youtube, naka open naman ang Facebook account nya sa kabilang computer. Nasa kabilang bahagi siya ng room, kaharap niya ang pinto.

Ang laboratory 1 ay mayroong 36 units. Magkatabi-tabi ang units ng mga computers. Sa tabi ng pinto ay may bintanang may salamin, kaya maikikita niya ang mga estudyanteng dumaraan galing sa library o galing sa kabilang corridor.

Kapag nakatayo ka naman sa labas at sisilip sa bintana, makikita mo ang isnag hilera ng computers, kaya ayaw ng mga estudyanteng pumwesto sa tabi ng bintana kasi makikita kapag nagpi-Facebook lang sila.

Naaliw si One sa kanyang ginagawa, kaya nung matapos na niya lahat ng units, saka niya napansin na alas-nuwebe na ng gabi. Alas-siyete hanggang alas-otso ang huling klase. Gutom na rin siya.

Okay lang na gabihin, malapit lang ang kanyang boarding house na karamihan ay mg aka-klase at school mates lang rin niya ang kasama.

Tumunog ang kanyang cp, inabot nya ito at binasa. Galing kay Bianca:

“Part, diin ka na?”

Napangiti si One. Di naman siya kinilig kay Bianca. Pero, natuwa siya dahil may naghahanap sa kanya.

Isa-isang ini-off ni One ang computers na kanyang mga ginamit. Ini-off din ang aircon.

Maya-maya, bumukas ng bahagya ang pinto, napatingin siya rito. May malamig siyang hangin na naramdaman. Baka galing sa labas, naisip niya.

Bumukas pa lalo ang pinto at may sumilip na batang babae, mga 7 to 8 years old, mahaba ang buhok pero dahil medyo madilim di nya aninag ang mukha.

Di nya ito pinansin, baka anak ng isang teacher na nag extend ng klase. Kinuha nya ang kanyang bag at tumawid papuntang pinto.

“Kuya”, tawag ng bata sa kanya. “Pwede pa-internet?”

“Pauwi na ako eh, kaninong…?” bago pa nya natanong sumara ulit ang pinto, nakalapit na siya rito. Agad binuksan ni One at tiningnan kung saan pumunta ang bata.

Nakita nya itong tumakbo habang kumakanta-kanta pa patungo sa Room F, kanang bahagi ng second floor, umikot ito sa hallway pakaliwa. Di na nya ito nakita kung saang classroom pumasok.

Binale-wala ni One at bumaba para umuwi.

Nag aayos na rin si Guard.

“Tagal mong bumaba ah,” bati ni Guard kay One.

“May inayos lang. Kaninong anak yung batang babae sa taas?” naalala niyang tanong.

“Ha? Wala nang may klase sa taas ng alas-siyete hanggang alas-otso. Saka walang faculty ang may bitbit na anak ngayong araw,” kwento ni Guard.

“Pero may batang babae sa taas,” insist ni Juan.

“Titingnan ko, baka may dalang chicks sina Dexter,” tumawa si Guard. Stay-in working students sina Dexter at Beto sa School.

“Sama ako,” lakas-loob na sabi ni One.

Umakyat sila sa hagdan na malapit sa gate. Pagdating sa second floor, dumeretso si One patawid malapit sa Lab1. Si Guard naman sa may AVR dumaan. May malaking square na butas na may railings kasi ang Second Floor kaya nahiwalay ang daan papuntang Lab1 at ang daan malapit sa AVR. Nasa tabi ng malaking butas ang Crim Lab Room kaya di makita ang Room D, E at F. Pero ganun pa man, and dulo ng parehong hallway ay magkakasalubong sa papuntang tatlong rooms.

Pagdating sa dulong hallway, patay na ang ilaw ng Rooms E at F, kaya tumuloy si One palapit kay Guard na kabilang dulo. Nakatayo si Guard sa harap ng Science Lab. Ang Science Lab ay malapit sa Faculty Cr. Kapag ka sumilip ka sa bintana na naka grills, tanaw mo na ang isang bahagi ng sementeryo.

Itinuro ni Guard ang ilalim ng pinto, may liwanag. Bukas ang ilaw sa loob. 

“Baka sina Dexter,” bulong ni Guard.

Bago pa nakasagot si One, biglang binuksan ni Guard ang pinto ng Science Lab.

Isang batang babae ang nakatayo sa teacher’s table, lumingon ito sa kanila, tumawa na parang nakikipaglaro at biglang lumundag, tumakbo at lumusot sa pader sa tabi ng bintana patungong sementeryo na parang hangin.  

Nagkatinginan si Guard at One. Kahit namumutla, nagawa pa nilang isara nag pinto pero naiwang nakabukas ang ilaw sa loob.

Halos patakbo silang bumaba patungong gate. Di sila makasigaw dala ng sobrang gulat at takot.

“Sino yun…?” Tanong ni One na kinilabutan.