The Classic Horror Show Ch2

Photo: scandallas.wordpress.com

CHAPTER II      Steve

“Buong pangalan talaga? Di mo sinama apelyido ko”, asar kong bati.

Tumawa lang siya, “Wag ako ang sisihin mo,” binuksan ni Steve ang pinto at pumasok na kami sa GF4. Ang GF4 ay nasa likoran bahagi ng building, nasa ground floor. Pader lang yata ang pagitan, nitso na.

Kaming tatlo pa lang ang nasa room.

Computer Science ang course naming tatlo. Marami kami nung freshmen kami pero ng tumagal ay pakonti na kami ng pakonti. May maintaining grades ang CS at ang hirap ng major subjects. Yung iba, advised to transfer, yung iba nagkusa ng nagshift ng course. Ngayong third year na kami, anim na lang kami. Dalawa kami ni Teri ang babae, at apat na puro pasaway na lalake.

Si Steve ang kilalang kilabot ng mga First Years. At dahil June, masaya si Steve dahil maraming bagong enroll.

Pumuwesto kami ni Teri sa gitna ng room. May bakanteng upuan sa pagitan namin.

Si Steve, umupo sa harap malapit sa may pinto na hindi isinara. Kinuha nya ang kanyang cellphone at malamang nagtitext or nag uupdate ng status sa kanyang FB habang nakikinig ng music. Isinuot kasi nito ang headset.

Ganun din si Teri, abala din sa kanyang CP. Wala naman akong ka-text at di ako addict sa FB kaya di na ako naglabas ng CP. Besides, hindi android ang CP ko.

Nakayuko pa rin si Steve, busy sa cp. Maya-maya, may babaeng pumasok at tumayo sa harap ni Steve.

Bigla itong umiyak. Walang hikbi na narinig pero tuloy ang luha ng babae. Umangat ang ulo ni Steve. Humarap sa babae.

Siniko ko si Teri na naka-headset na pala. Aabangan naming ang dramang mangyayari. Malamang isa ito sa syinota ni Steve last sem.

Pinanuod ko silang dalawa. Patuloy ang iyak ng babae. Wala namang ginawa si Steve, nakatingin lang din ito sa kaharap.

May itsura yung girl, maputi, wavy yung hair na medyo blond, nagkulay yata. Mapula yung labi, uso talaga bloody red lipstick. May cute na nunal sa right side malapit sa labi. Luha pa rin ito ng luha, wala pa ring reaction si Steve.

Biglang pumasok si Sir Ray kasunod ang tatlong itlog.

“Get one whole sheet of yellow paper,” sabi agad nito.

Di na kami nagtaka, ganun talaga si Sir. Di ko na napansin ang pag alis ng girl sa harap ni Steve. Busy na akong manghalungkat ng bag para maghanap ng ballpen. Manghihingi na lang ako ng papel.

Lumingon sa amin si Steve, tinaasan ko siya ng kilay. Ngumiwi lang siya at humarap sa whiteboard. Sinusulat ni sir ang plate namin for the day. 

Natapos ang klase.

“Hoy, manyak,” tawag ko kay Steve. “Sino na naman yung babaeng pinaiyak mo?”

Ngumiti lang siya.

“Tindi mo Teban,” sabat ni Justin, na umakbay na sa akin. Sumunod kami kay Steve sa paglabas ng room.

“Pinaiyak ba? Pinaiyak sa sarap!” dagdag ni One.

Tawanan ang lahat.

“Manyak ka talaga Juan,” sabi ni Tere na nakasunod na sa amin.

“Tere, One. ONE!” Binangga-bangga ni One si Tere na para silang naglalaro ng basketball.

“Letse!”

“Ginutom ako sa plate ni sir,” sabi ni Samuel.

“Lagi ka namang gutom Samuel,” sabat ni Sir Ray na di pa pala nakalayo. “Kaya di ka pumapayat eh.”

“Sir, kung payat ako at pogi pa, akin na lahat ng chicks.”

“IYD!!!” sabay sabay naming sigaw kay Samuel.